Тәуелсіздік – таймайтұғын тағым бұл!

Өткен жұмада Құмарық ауылындағы Болтай батыр атындағы орта мектепте ел Тәуелсіздігінің 30 жылдығына орай «Тәуелсіздік – білімді елдің тұ­ғыры» деген тақырыпта ғылыми-тәжірибелік конференция өтті. Атал­мыш ғылыми-тәжірибелік конференцияға облыс әкімдігі білім басқармасының оқу-әдістемелік кабинетінің бөлім меңгерушісі Гүлзат Келдібаева, «Назарбаев зияткерлік мек­тептері» ДББҰ Педагогикалық ше­берлік орталығы Тараз қаласындағы филиалының тренері Ақбота Тоқта­ғанова, «Өрлеу» БАҰО-ның Жам­был облысы бойынша педагог кадр­­лардың біліктілігін арттыру инсти­­туты басшысының оқу-әдісте­мелік ісі жөніндегі орынбасары, педа­гогика ғылымының кандидаты, профессор Шынар Тойғанбекова, ау­дан аумағындағы бірқатар білім ошағының басшылары мен мектеп директорларының ғылыми әдістемелік ісі жөніндегі орынбасарлары, мұғалім­дер, балабақша меңгерушілері, тәрбие­шілер қатысты. Конференция өте жоғары дең­гейде ұйым­дастырылды. Болтай батыр атындағы орта мектептің директоры Рәбиға Кеңесқызы жауапкершілік дейтін құнды қасиетті жете түсініп, барлығын рет-ретімен ұйымдастырып қойыпты. Кон­ференция басталмай тұрып, келген қонақтар ұлттық на­қышқа толы көрме суреттерін тамашалап шықты. Қандай ғажап! Тәуелсіздік тойында қайдағы бір жасандылыққа толы жылтырақ дүниелердің емес, жігерімізге жігер қосатын, көне тарихымызды баяндайтын картиналардың қойылғанына дән риза болдық. Мектеп басшысын жете танымасақ та, «бойында ұлттық намысы қайнаған, жүрегі елім деп соққан азаматша екен» деген ойға қалдық.Қош. Сонымен конференция бас­талды. Конференция шымыл­дығын аудандық білім бөлімінің басшысы Майра Базарова сөз сөй­леп ашып берді. Содан соң облыс әкім­дігінің бі­лім басқармасы оқу-әдістемелік ка­би­не­ті­нің бөлім меңгерушісі Гүлзат Елемесқызы Тәуелсіздік жыл­да­рында еліміз жеткен жетіс­тіктер жайында, «Назарбаев зияткерлік мектептері» ДББҰ Педа­гогикалық шеберлік орта­лығы Тараз қаласындағы филиалының тренері Ақбота Сағындыққызы «Тәуелсіздік құндылықтарын қалыптастыру – мұғалімнің кәсіби міндеті», «Өрлеу» БАҰО-ның Жамбыл облысы бойынша педагог кадрлардың біліктілігін арттыру институты басшысының оқу-әдістемелік ісі жөніндегі орын­басары, педагогика ғылы­мының кандидаты, профессор Шынар Мәлібайқызы «Тәуелсіз Қазақстан – Мәңгілік ел мұра­ты» деген тақырыпта бағ­дар­лы баяндама жасады. Ал өзі Жел­тоқсан көтерілісі кезінде алаңда болып, сондағы жастардың жанкештілігін көрген Бауыржан Момышұлы атындағы орта мек­тептің ағылшын тілі пәні­нің мұғалімі Ұлған Айна­кеева­ның «Тәуелсіздік – біздің ең бас­ты игілігіміз, баға жетпес құн­ды­лығымыз» деген тақырыпта жа­саған баяндамасы біздің жүре­гімізді шымырлатты, шыны керек.
Бұдан соң конференция ба­рысы 3 секция бойынша өрбіді. Біз әуелі жалпы білім беретін мектептердің педагогтары үшін «Тәуелсіз Қазақстан: жетістіктер, мәселелер, болашақ» тақырыбы бойынша өрбіген секция оты­рысына қатыстық. Онда Бол­тай батыр атындағы орта мек­тептің тарих пәнінің мұға­лімі, секция отырысының моде­раторы Гүлбану Шөкешова «Тәуелсіздік – қазақ халқының ұлы мұраты», Бауыржан Момыш­­ұлы атындағы орта мек­тептің тарих пәнінің мұғалімі Толғанай Берденова «Желтоқсан – Тәуелсіздік бесігі», №2 шағын орталықты орта мектептің қа­зақ тілі мен әдебиеті пәнінің мұғалімі Жеңіс Өтепбергенова «Тәуелсіз Қазақстанның өткені мен бүгінгі жетістігі», №1 мек­­теп-лицейі директорының ғы­лыми әдістемелік ісі жө­нін­дегі орынбасары Нұр­жамал Бейсенова «Тәуелсіз Қазақстанның жарқын болашағы жо­лындағы тарихи қадамдар», Әлихан Бөкейханов атындағы орта мектептің ағылшын тілі пәнінің мұғалімі Шырын Оспанова «Ынтымақ, бірлік, татулығы жарасқан Тәуелсіз Қазақстан», Ақтоған шағын орталықты орта мектебінің тарих пәнінің мұғаліміАйман Нүсіпова «Тәуелсіздік – киелі ұғым», Абай атындағы орта мектептің тарих пәнінің мұғалімі Дастан Асқаров «Қазақ халқының Тәуелсіздігі» және Тұрар Рысқұлов атындағы мектеп-лицейінің бастауыш сы­нып мұғалімі Гүлнәр Орын­басарқызы «Қазақстан – мәңгілік Тәуелсіз ел» тақырыптарында баяндама жасады. Ал «Тәуел­сіз елім – ардақты мекенім» деп аталатын секция оты­ры­сы қосымша бі­лім беру ұйым­дарының педа­гогтарына ар­налды. Онда аудандық балалар мен жас­өспірімдер орталығы дирек­торының оқу-тәрбие ісі жөнін­дегі орынбасары, секция отырысының модераторы Гүлсана Сейтбаева «Тәуелсіздік – тәу етер жалғыз кие», Мұх­тар Әуезов атындағы тірек мек­тептің қосымша білім беру педагогы Мәншүк Есімбекова «Тәуелсіздік – ең биік тұғырым», Шолаққайыңды бастауыш мектебінің меңгерушісі Жанат Сейдалиева «Тәуелсіздік – білімді елдің тұғыры», Жас натуралистер станциясының қосымша білім беру педагогы Әсем Батыршақызы «Тәуелсіздік – ащы термен келген тәтті жеңіс», Өнер мектебінің қосымша білім беру педагогы Нұргүл Мұқанова «Тәуелсіздік бәрінен қымбат ұғым», балалар мен жасөспірімдердің туризм және өлкетану орталығының педагогы Гүлзат Қалтаева «Тәуелсіз елім­нің өркендеу жолы», Жас натуралистер станциясының қосымша білім беру педагогы Сандуғаш Сатанова «Тәуелсіз елім – ардақты мекенім» деген тақырыпта баяндама жасады. Үшінші секция отырысында мектепке дейінгі білім беру ұйымдарының педагогтары «Тәуелсіз Қазақстан: кеше және бүгін» тақырыбында сөз қозғады. Атап айтқанда, «Бәйшешек» бөбекжай-бақ­шасының меңгерушісі Қалам­қас Қорымбаева «Қа­зақстан кеше және бүгін», «Алтын сақа» бөбекжай-бақшасының меңгерушісі Гүлмира Досқожаева «Тәуелсіз ел тірегі – білімді ұрпақ», Ақтоған шағын орталықты орта мектебінің мектепалды даярлық тобының тәрбиешісі Әсем Солтанаева «Қазақстанның тәуелсіздігі – Мәңгілік елдің ұлы тарихы», Қызылпан Сұлтанбеков атындағы орта мек­тептің мектепалды даярлық тобының тәрбиешісі Айзада Са­дыбекова «Тәуелсіздік бәрінен де қымбат», «Балбөбек» бөбекжай-бақшасының тәрбиешісі Индира Баймұратова «Тәуелсіз Қазақстанның та­рихи бастамалары және бола­шағы», «Ерке Нұр» шағын орта­лығының тәрбиешісі Кәмшәт Абитханқызы «Егемен елдің еңсерген 30 жылы», «Аяулым» бөбекжай-бақшасының тәр­биешісі Амангүл Абдуқалиқызы «Тәуелсіздік – ел тұғыры» деген тақырыпта баяндама жасады.
Конференцияда аудандық білім бөлімі басшысының орын­басары Бауыржан Самылтыров сөз сөйлеп, тәуелсіздік хақында оябы бөлек ой айтты. Аудандық білім бөлімінің методикалық кабинет меңгерушісі Кә­діржан Медеров те сөз алып, осы конференцияға атсалысқан барлық педагогтарға, балабақша меңгерушілеріне, тәрбиешілерге жеке алғысын білдірді. Әсіресе, мектеп директорларының ғы­лыми әдістемелік ісі жөніндегі орынбасарларынан құралған «Ұшқын» шығармашылық тобының атқарған жұмысына дән ризашылығын жеткізді. Себебі олар «Тәуелсіздік – білімді елдің тұғыры» деген кітаптың жарыққа шығуына ерекше қолдау білдірген. Конференция соңында бірқатар мұғалімдер мен балабақша меңгерушілері, тәрбиешілерге алғыс хат табыс етілді.

Марат Диханбай.

Поделиться ссылкой: