Қазіргі қоғамдағы отбасылық құндылықтарды нығайту жолдары

Қазіргі қоғамдағы отбасылық құндылықтарды нығайту жолдары

Отбасы – қоғамның ең маңызды тірегі, ұлттық тәрбиенің алтын бесігі. Қазіргі жаһандану дәуірінде технологияның дамуы, әлеуметтік желінің ықпалы, өмір сүру қарқынының өзгеруі отбасы құндылықтарына да өз әсерін тигізуде. Сондықтан отбасылық құндылықтарды сақтау мен нығайту – бүгінгі қоғамның басты міндеттерінің бірі.

Қай қоғамда болмасын отбасы – тәрбиенің, адамгершіліктің және рухани құндылықтардың қайнар көзі. Қазақ халқы ежелден отбасының бірлігі мен татулығына ерекше мән берген. «Отан – отбасынан басталады» деген нақыл сөздің өзі отбасының қоғамдағы орнын айқын көрсетеді.

Отбасылық құндылық дегеніміз – сыйластық, мейірім, жауапкершілік, адалдық, үлкенге құрмет, кішіге ізет сияқты адамгершілік қасиеттердің жиынтығы. Осындай құндылықтар қалыптасқан отбасында береке мен бірлік болады. Баланың тәрбиесі де ең алдымен отбасынан басталады. Сондықтан ата-ана өз іс-әрекетімен балаға үлгі болуы тиіс.

Қазіргі кезде технологияның дамуы мен әлеуметтік желілердің кең таралуы адамдар арасындағы тікелей қарым-қатынасты азайтып барады. Кей отбасыларда әркім өз телефонымен әуестеніп, бірге өткізетін уақыт азаюда. Бұл – отбасы мүшелерінің бір-бірінен алыстауына әсер ететін факторлардың бірі. Сондықтан отбасында ортақ дәстүр қалыптастыру маңызды. Мысалы, бірге ас ішу, демалыс күндерін бірге өткізу, кітап оқу немесе спортпен айналысу отбасы мүшелерінің жақындасуына көмектеседі.

Отбасылық құндылықтарды нығайтуда ұлттық тәрбиенің де орны ерекше. Қазақ халқы үлкенді құрметтеп, кішіге қамқор болуды ұрпақ тәрбиесінің негізі санаған. Ата-әже тәрбиесі, салт-дәстүр, әдептілік қағидалары – бала тәрбиесіндегі маңызды құралдар. Осындай ұлттық құндылықтарды дәріптеу арқылы жас ұрпақтың бойында отансүйгіштік пен адамгершілік қасиеттер қалыптасады.

Қазіргі қоғамда отбасы құндылықтарын нығайтудың бірнеше тиімді жолдары бар. Біріншіден, ата-ана мен бала арасындағы қарым-қатынасты күшейту қажет. Күнделікті әңгімелесу, бірге уақыт өткізу, баланың ойын тыңдау – оның рухани дамуына оң әсер етеді. Екіншіден, ұлттық тәрбиеге ерекше көңіл бөлу маңызды. Қазақ халқы ежелден отбасылық тәрбиеге мән берген. Үлкенді сыйлау, ата-ананы құрметтеу, бауырмалдық қасиеттерді бала бойына сіңіру қажет.

Үшіншіден, отбасы мүшелерінің цифрлық тәуелділіктен алшақтап, бір-бірімен шынайы қарым-қатынас орнатуы маңызды. Қазіргі таңда көптеген отбасында әркім телефонға тәуелді болып, ортақ әңгіме азайып барады. Сондықтан отбасылық кештер, бірге кітап оқу, спортпен айналысу, саяхаттау сияқты жағдаяттарды қалыптастыру пайдалы.

Сонымен қатар мемлекет пен қоғам тарапынан да отбасын қолдау жұмыстары жүргізілуі тиіс. Отбасын қолдау орталықтарының жұмысы, психологиялық кеңестер, ата-аналарға арналған тренингтер мен тәрбиелік іс-шаралар қоғамдағы отбасы институтын нығайтуға көмектеседі.

Қорытындылай келе, отбасы құндылықтарын нығайту – ұлт болашағын нығайту деген сөз. Тәрбиелі ұрпақ – берекелі отбасының жемісі. Сондықтан әрбір адам отбасының қадірін түсініп, сыйластық пен махаббатқа негізделген орта қалыптастыруға атсалысуы керек.

Г.Жиенбаева,

 «Т.Рысқұлов ауданы әкімдігінің

отбасын қолдау орталығы» КММ-нің әлеуметтік жұмыс жөніндегі маманы.

Поделиться ссылкой: