Өрнектегі ӨЗЕКТІ мәселелер өз шешімін табады

572 Views

Жамбыл облысы әкімдігі бекіткен жұмыс алгоритміне сәйкес Ерболат Салқынбекұлы бірнеше ауылдық  округтерге  жұмыс сапарымен барып, тұрғындардың тіршілігін байқап қайтқан болатын. Өткен аптаның бейсенбісінде аудан әкімі арнайы мемлекеттік органдардың басшыларымен бірге кезекті сапарын Өрнек ауылдық округінде жалғастырды.

Айта кетейік, тұмса табиғатымен ерекшеленетін Сұлутөр  тауының етегінде орналасқан округ — аудандағы ең үлкен ауылдық округтердің бірі. Қазақстанның Еңбек Ері Сайрамбай Дөненбаевты тудырған Жарлысу, атақты Әбжаппар Жылқышиев ауылы, округ орталығы Өрнек, күні кеше ғана сексеннің сеңгіріне шыққан Жошыбайдың Сейтханы туған Сәлімбай ауылы мен Сұмқайты елдімекені дәл осы Өрнек ауылдық округіне қарайды. Халықпен етене араласып, сол ортадан өсіп шыққан Бауыржан Ақүрпеков қазір ауыл әкімі қызметінде. Айтуынша, аймақта 16635 гектар егістік, 53854 гектар жайылым, 22269 гектар шабындық,400 гектар суғармалы алқап бар. 4 мектеп, 3 кітапхана, 3 шағын орталық, 2 амбулатория, балабақша,  клуб, ветеринария мекемесі, мектеп-интернат, 1 өлкетану мұражайы бүгінде елді мекенде тұратын 4200 тұрғынға қызмет көрсетіп отыр.

Аудан әкімі Ерболат Салқынбекұлы іссапарын  Жарлысу ауылында жаңадан ашылған «Тәттімбүбі» балабақшасынан бастады. Мекеме жағдайымен танысқан соң, балабақша алдына абаттандыру жұмыстарын жауапкершілікпен жүргізіп, отырғызылған ағаштар мен гүлдерге ерекше күтім жасау керектігін тілге тиек етті. Әрмен қарай Әбжаппар Жылқышиев ауылында орналасқан өлкетану мұражайына кіріп, орталық қызметкерлеріне көңілге қонымды кеңестер берді. «Мәселен, Өрнек қалашығынан табыл­ған тарихи жәдігерлер туралы зерттеу жұмыстарын толық жүргізіп, нақты әрі толық ақпаратпен келушілерді қамтамасыз ету керек. Сол арқылы балалардың өзі туып өскен мекенді зерттеуге деген қызығушылығын арттыруға болады. Әрі әлі ашылмаған тарих тылсымын танып, ертеңгі күнге ерекше жаңалық енгізер тарихшы тумасына кім кепіл?» деп, алдағы атқарылар жұмыстарға табыс тіледі. Сондай-ақ, аймақта халық жағдайы үшін қызмет ететін  аурухана қызметкерлерімен тілдесіп, ақ халатты абзал жандарды төл мерекелерімен құттықтады. Білікті маманның міндеті мемлекеттік қызмет түрлерін жатқа білу ғана емес, тұрғындар үшін қолдан келгенше аянбай тер төгу екендігін айтты. Дегенмен, тазалық тәмсілі болған денсаулық сақтау үйінің тазалығына аса көңілі толмады. Расында, округте орналасқан амбулаторияның бірінде тек дәрігерге дейінгі көмек көрсетіледі. Ал, қаңқасы ескі заманда қаланған округ орталығындағы  амбулаторияға мардымды  жөндеу жұмыстарын жүргізу қажет. Дәл осы медпункт жыры Сәлімбай ауылында да өзекті. Жуырда өткен аудандық мәслихаттың сессия отырысында аталған мекенге медпункт салу керектігі жайлы сөз қозғалған еді. Сондықтан, берілген уәде уақытылы орындалады деген сенімдеміз. Сапар барысында аудан әкімі ауылдық округтегі білім беру ордаларының да хал-ахуалымен танысты. Мекеме басшыларына «нағыз басшы барды жоқ қылмайды, жоқтан бар жасайды» деп, басшылық қызметтің жәй-жапсарын жете түсіну керектігін айтып, арнайы тапсырмалар берді. Округтегі мектептер толығымен ауыл балаларын қабылдауға қауһарлы. Тек Сұмқайты елдімекенінде білім беру ордасының жоқтығына байланысты оқушылар Ақыртөбе орта мектебіне қатынайды. Ол үшін жыл сайын  ауылдық округ әкімдігінен  қаражат бөлінеді.

Аталмыш өлкеде халық қажетті­лігінен туындаған «тізесі» шыққан та­қырыптар да жетерлік. Мәселен, Әбжаппар ауылының тұрғындары әлі күнге арықтан аққан суды тұтынады. Бұл мәселенің майы ішіліп, сорпасы қайнағалы қашан? Сондай-ақ, ок­руг орталығынан өзге ауылдарда орта­лықтандырылған су жүйесі жоқ. Аудан әкімі Сәлімбай, Жарлысу, Әбжаппар, Сұмқайты елді-мекендерін сапа­лы ауыз сумен қамтамасыз ету жұмыс­тарын жүргізу керектігін айтып, тиіс­ті сала басшыларына тапсырма бер­ді. Ауыл ағаларының айтуынша, асық­ты алшысынан түсіріп ойнайтын балалар ойын алаңдарын аса қажет етпейді екен. Жә, бастысы алаң бар. Көгілдір отын мәселесіне келсек, округ бойынша 88 аулаға газ кірмеген. Өрнек ауылының өзінде 41 аула үй алдына келіп тұрған табиғат байлығының берекесін көре алмай отыр. Айта ке­те­тін қуанышты жайт, аудан әкімі өз сөзінде округке газ құбырларын жүр­гізген мердігерлермен тілдесіп, ке­лісім орнатқанын айтты. Демек, осы уақыт­қа дейін аулаға газ кіргізу үшін 315 мың теңге қаражат жұмсасаңыз, енді 200 мың теңгеге кіргізе алады екен­сіз. Ерболат Салқынбекұлы аталған ба­ғаны 95 мың теңгеге түсіру үшін тағы да келіссөздер жүргізетіндігін жеткізіп, тұрғындарды қуантты. 2 ай көлемінде  ауылдық округті міндетті түрде газбен қамтамсыз ету керектігін, ол үшін жағдайы төмен отбасыларға соманы бөліп төлеу мүмкіндігін де қарастыратынын мәлімдеді.

Жасалған іссапар бойынша Алғабас орта мектебінің акт залында аймақ тұрғындарымен қорытынды жиын өтті. Округ әкімі Бауыржан Ақүрпеков халықты ағымдағы жылдың 5 айында атқарылған жұ­мыс­тар тізімімен таныстырды. «Осы уақытқа дейін келіп түскен 26 жаз­баша өтініштерді уақытылы қарас­тырып, жеке тұлғалармен жүздесу жұмыстары жүргізілді. 23 балаға ша­ғын орталыққа жолдама берілді. Әбжап­пар ауылындағы бейітті қоршауға жергілікті бюджеттен 1 млн 100 мың теңге бөлінсе, көше шамдарын ауыс­тыруға 200 мың теңге бөлініп, толы­ғы­мен шамдар ауыстырылды. Аймақта 385 көп балалы отбасы тұрады. Оларға әлеуметтік көмек беру жұмысы шарт­ты және шартсыз түрде іске асады. Жыл басында 93 отбасынан өтініш ке­ліп түсіп, қазір 87 отбасы әлеуметтік кө­мек алады» дейді. Жиын әрмен қарай ер­кін форматта өтті. Аудан әкімі мен окург әкіміне тұрғындар толғантқан сұрақтарын тікелей қойып, жауабын алды. Газ, су, жол, жарық мәселесінен өз­ге ауылға мәдениет үйін салу керек. Қызығы сол, талай топты жарған таны­мал таланттар мен мәдениет қайрат­керлерін тудырған өлкеде бірде-бір мә­дениет үйі жоқ. Аталған өлкеден кіл жақсылар мен өнерлі өрендердің өсіп шығатынын жақсы білеміз. Кешегі  гитарасын жанына серік еткен әнші Гүлмира Ақүрпекова, сахна саңлағына айналған Жалғас Толғанбайдың өзі дәл осы өлкеде туып өскен. Өнердің өресін, қадірі мен қасиетін жете ұғын­ған тұрғындарға мәдениет үйін салып бермеу ұят тірлік болары анық енді. Сондай-ақ, кезекті сауалдарының бі­рін­де ауыл ақсақалдары егістік жерлер мен жайылым жерлердің жайын қоз­ғады. Жеке меншікте жүрген бос жер­лерді халыққа пайдалануға қайтару керек деп өтініштерін білдірді. Жиын соңында ақсақалдар жұмысына жаңа кі­ріс­кен аудан әкіміне толағай табыс­тар тіледі. Үлкеннің қуанышын көріп, батасын алған Ерболат Салқынбекұлы да тұрғындар қамы үшін аянып қал­майтындығын жеткізді. Аудан әкімі­нің жіті қадағалап, ескертуімен хатта­ма­ға еніп, қағазға түртілген істің қарала­ты­нын білеміз, қаралған іс өз шешімін табады деп сенеміз.

Нұрай ЖАЙЛАУБАЙ.

Поделиться ссылкой: